«سەودای سەفەر»

«سەودای سەفەر»

سەعید ئەمانی

دەمەو ئێوارەی تەمەنە و

بەفری کەسەر کولو کولو

بەسەر شان و ملی کزی

تانیاییمدا دادەبارێ

 

کزەبای خەم

موسیقایەکی حەزین

بەژێی بیرەوەریە تاڵەکان دەژەنێ

 

هەور و تەمی ئەم جستانی دڵتەنگیە

گشت رووناکیی دەلاقەکانی ژیان

بە پێدزکێ دادەشارێ

 

پەڕەسێلکەی نەسرەوتوی تاسە

بێ ئۆقرەیە و

دەگەڕێ لەدووی هێلانەی

گەرمی ئەوینی دڵدارێ

 

دەفڕێ بۆ دوور

دەبڕێ سنوور

دەپشکنێ بن گوێسوانەی هەستەکان و

گوێدەگرێ لە

ورتەی گەڵای دارەکانی لێڕەوار و

سریوەی باوەشی سەوزی

سنەوبەری گوێ شەقام و پارکی دڵی هەموو شارێ

*****

چاوەڕوانیم

جەستەی شەو دەگرێتە ئامێز

پەڕەسێلکەی شەوارە بوو

بێ سۆراغە و نایەتەوە

سەودای سەفەر کردویەتە

نێجیری چنگی تەوارێ.

Read Full Post »

» بەخێر هاتی»

» بەخێر هاتی»

سەعید ئەمانی

 

لەوکاتەوە

لەزگەی مرواری وشەکانت

پچڕایەوە و

ڕژایە لەپی هەستمەوە

چەپکێ کەزیەی ئەوینیشت

کەلەپچە ئاسا

مەچەکی دڵی بەستمەوە.

 

ئەم دیلیە

ئازاد بوونی پێ بەخشێوم

لە داوی کەسەر ڕزگار و

بەرەو شادمانی خۆشیوم

هەرچەندیش

کەمێک دێرهاتی

لەناخەوە

هاوار دەکەم

بەخێر هاتی.

Read Full Post »

» ئاوابوونی بەیان»

پەخشانێک پێشکەشە بە » مەلەکە» ی خەمە مەزنەکانی شۆرشی چەوساوەکان

سڵاو » مەلەکە» ی خەمی مەزن
سڵاو لوتکەی ئازاری برینی شۆڕش

ئەوا ئێوارەی شەوی ناسۆرێکی تر
» بەیان» ی هیوای ژینی لێ ئاوا کردی

ئەی ئاسمانی کەسەری
چەندین ئەستێرەی گەش تێدا کوژراو
ئەی سەیوانی بیرەوەری
چەندین خەمی مەزنی شۆڕش و هیوای هەژاران تێدا نێژراو

تەنیا هەر تۆی بەرگە ئەگری
تەنیا هەر تۆی ئەتوانی
هەگبەی ئەم ژانە قورسانە لە کۆڵ بگری

ڕێبوارانی ڕێگای
کاک فوئاد و دوکتور جەعفەر
هاوسەنگەرانی شەهیدەکانی تر
شان بە شانت وان لەژێر تابوتی
ئەم خەمە گەورەدا و دێن تاوەکو
لە بیرەوەریدا بینێژن
هاتون بەشداری خەمت بن و
لە ناخەوە ئازارەکانت بچێژن

» مەلەکە» ی خەمی بەرزە باڵای گەل!
کۆتری شەڵاڵی خوێنی سەر ئاڵای گەل
هێور بەوە و چاوێک لە دەوروبەرت کە
چاوێک لە بەشدارانی بێ ئەژماری کۆڕی خەمت کە

بڕوانە چۆن
لە گەمارۆی خۆشەویستی و ڕێز گیراوی
بڕوانە چۆن وەک نگینێک
لە تاجی شکۆ و شانازی دراوی

هێور بەوە و سەبوری ئێمە بەرەوە
تۆ لە هەموان بەهێز تر و خاراو تری
لە قۆزاخەی خەم بشکۆفێ و
وەکو پێشو بەرەنگاری
لەشکری بەرینی خەمی
پڕ لە ناسۆرت بەرەوە
ئەی یادگاری خەمی شکۆدار و مەزن
سەبوری ئێمە بەرەوە.

 

 

سەعید ئەمانی

سلێمانی ١٦ ی خرمانانی ٩٥ ی هەتاوی

Read Full Post »

» ئێمە هەمومان مرۆڤ بووین»

کورتە شێعرێکی «سادق هیدایەت»

و: سەعید ئەمانی

لە ڕاستیدا
ئێمە گشتمان مرۆڤ بووین!…
تا ئەوەی کە
ڕەگەز!
پێوەندیمانی هەڵبڕی!!
ئاین!
ئێمەی لەیەکتر دابڕی!!
سیاسەت!
دیواری خستە نێوانمان!! و
سەروەت!
چینی لێ دروست کردین!!

هەموان ئازادیان دەوێت
بەبێ ئەوەی بزانن کۆیلایەتی چییە!

کۆیلایەتی بەو میلانە نییە
کە دەوری جەستەتی داوە
بەو حەسار و دیوارەیە
کە ئابلۆقەی بیر و ئەندێشەتی داوە.
————————————————————————————

صادق هدایت

در حقیقت
ما همه بشر بودیم!…
تا اینکه
نژاد!
ارتباطمان را برید!!
مذهب!
از یکدیگر جدایمان ساخت!!
سیاست!
بینمان دیوار کشید!!
و ثروت!
از ما طبقه ساخت
همه آزادی میخواهند بی آنکه بدانند اسارت چیست!
اسارت به میله های دورت نیست.
به حصارهای دور تفکرت است!

Read Full Post »